KO'EI NAMA BARR NAHIN HAI Na hawa ka narm jhonka Na jamal chandni ka Na ko'ei haseen badal Na kisi karam ki barish Na ko'ei gudaz lehja Na kisi nazar ki jumbish Teray raastay pe mera Ko'ei hammsafar nahin hai Tujhay khatt likhoon agar to Ko'ei nama barr nahin hai!
2 TERAY NAAM KAY SATH Muskuranay lagi sehmi huwi raat khill ga'ay charon taraf phool hi phool ko'ei khushboo si mujhay choo kay chali gungunanay lagi phir baad-e-saba yoonhi baton mein nikal aa'ei thi baat yoonhi ik shakhs nay anjanay mein aur hi logon kay afsanay mein lay liya naam mera aaj teray naam kay sath! 3 NA RASA Kabhi ik paer kay peechay kabhi phoolon bhari uss shakh kay neechay mujhay bass dooryon say muskura karr takta rehta hai kabhi baad-e-saba kay sath ik halki sherarat say meray malboos ko chhoo karr guzarta hai, meray hathon ki uss takk kya rasa'ei ho nazar ki dastaras mein jo nahin aata! 4 GHAZAL Yarabb! labb-e-khamosh ko aisa kamal day Jo guftgoo kay saray hi lehjay ujal day Soaz-e-duroon-e-qalb ko itna jamal day Jo mujh ko aik shamma kay qalib mein dhal day Woh khwab marhamat ho ke aankhein chmak uthein Woh sarr khushi ata ho ke dunya misal day Woh harf likh sakoon ke banay harf-e-purr asar Ik kaam karr sakoon too mujhay garr majal day Main apni sha'eyri kay li'ay aa'eina banoon Rahat nahin,too mujh ko baqa'ay malal day Teray hi aastan pe jhuki ho jabeen-e-dill Apnay hi darr kay wastay khoo'ay sawal day 5 AJNABI AA'O Ajnabi aa'o! dekho, umangon ki naokhez kalyan jo murjha rahi hain, tumharay liay waqt,chanchal parinda meray saans pathar talay dabb rahay hain meri umr kuchh katt chuki hai jo baqi hai-ik karb mein katt rahi hai agar ajnabi tumm na aa'o--- to peghaam bhejo agar ko'ei chanchal parinda milay waqt ka uss ki gardan mein bandho ko'ei sabz kaghaz ko'ei sabz kaghaz ke jiss parr likho apnay hathon anokhi,purasrar,sabb ranng tehreer phir woh parinda-meri samt bhejo to phir ajnabi! woh parida agar ho sakay to meray saans pathar talay say nikalay mera karb chakhay woh kaghaz, tumhari purasrar,sabb ranng tehreer wala, ko'ei sabz taweez karr kay meri sooni gardan mein dalay!
6 MEHRBAN Woh aik dinn tha jo saal bharr mein shareek thay unn dinon kay jaisa, woh aik dinn tha jo mautabar tha woh aik lamha tha jitnay lamhay,uss aik dinn mein shareek thay unn say milta julta bass aik lamha,jo muhtarim tha ke neem tareek rahdari mein chaltay chaltay jo uss nay nazrein uttha kay dekha tthitthak kay, rukk karr jo uss nay dekha to main nay ghabra kay sarr jhukaya tha uss ki aankhon mein kya tha? pehay pehl to main yeh samajh na pa'ei -----phir aik lamhay mein uss ki nazron kay,meri aankhon talak pohunchnay kay aik lamhay mein kitni sadyan ttheher ga'ei thien woh aik lamha jo muhtarim tha ka'ei zamanon kay saray aalam kay raaz mujh na tawan pay kitnay rasan say aashkar karr kay guzar gaya tha!
7 WIRD-E-JAAN Tera naam honton pay latay hi ilzaam kay sard patharr nigahon kay sangeen neshtar muqaddar banein gay isi khaof say,in hawaon ko phoolon ko,taron ko,mahtaab ko razdan main banati nahin hoon meray wird-e-jaan hay tera naam lekin main hontoan pay lati nahin hoon!
8 GULAAB KEHNA BHI Gulaab ugana to aik fann hay siyah matti ki koakh mein iss ki shaakh rakhna nikaltay booton ko seenchna aur khilay gulabon toarna bhi, siyaah balon mein aik andaz-e-dilruba say koei kali toar karr sajana bhi aik fann hay magar jabb uss nay haseen aankhon mein shokhiyan bharr kay mujh ko dheeray say ''Gull'' kaha tha to main nay soacha ''kisi kay chehray ko muskura kay gulaab kehna bhi aik fann hai buhat bara fann''!
GHAZAL Kisi kay husn-e-nazar ki nazeer hoon main bhi Nigah-e-ahl-e-jahan mein haqeer hoon mein bhi Agar too haqa-e-shaam-o-sahar mein qaid raha To zindgi kay qafas mein aseer hoon mein bhi Meray wujood mein jalti iss aag parr matt jaa Agar too door rahay,zemhareer hoon mein bhi Teray wujood say munkir jahan mein thi, main hi Teri nigaah ki abb to aseer hoon main bhi Meray li'ay bhi rahain abb faza'ein chashm baraah Saba kay sath khizan ki safeer hoon main bhi Wafa to sath nibhanay ka ik bahana hai Riwaj ki teri soorat,aseer hoon main bhi Main sirf jism nahin, aik zinda rooh bhi hoon Khuda kay baad,samee-o-baseer hoon main bhi
SIDHARTH Abb uss ka ghamm dill mein meray bettha hai yoon aalti paalti maray huway jaisay gyan mein ho kisi dhyan mein ho labb bheenchay aur aankhein meechay hai gumm summ main hairan hairan aankhein kholay,dekhti hoon aur soachti hoon ''pall bharr ko yeh garr meri taraf dekhay to main yeh arz karoon keh tujh jaisay gyani kay liay yeh jagha kuchh aisi ttheek nahin, yahan sabza hai yahan paani hai yahan saya hai parr yahin kahin dunya ka loabh jo basta hai!''
KAISAY Ghairon kay harr sitam kay muqabil thay hamm chatan phirr aap kay khuloos bharay aik lafz say kaisay bikhar ga'ey? LAMS ZINDA RAHAY Jotshi nay kaha'' teray maqsoom mein ik muhabbat hay aisi muhabbat azal say abad takk ki,sabb chahton ka jo hasil hai, ishq ki rooh bhi jiss mein jiss mein jari-o-sarihai [ik wehshiyana tarap aur kasak] aur ulfat ki dheemi,mehekti howi aanch bhi jiss ka hissa hai teri qismqt mein aisi muhabbat hai jo lams say mawra wasl ki khwahishon say juda hai dahnay hath ki aik rekha batati hai, tujh ko mehboob kay wasl say kuchh ta'aaluq nahin uss ki chahat faqat uss ki chahat tera muntaha-e-nazar ho to behtar rahay ga'' meray dill say ik aah nikli, magar uss muhabbat say kya faeyda? main bhi jalti rahoon woh bhi jalta rahay, abb to mehboob ko devta jaan karr ya khuda maan karr poojnay ki kahani-fasana huwi abb haqeeqat jo hai woh faqat wasl hai uss ki aur meri hasti ka shahid faqat lams hai! meray maqsoom mein peyar hai to meray hath mein ay Khuda! wasl qayam rahay!! lams zinda rahay!!! RAAT AUR INTAZAAR Raat bharr girti rahi ashk ki soorat shabnam raat bharr chalti rahi bheegi huei sard hawa narm podoan mein guzarti huwi madham madham, raat bharr chand sulagta raha holay holay chandni roti rahi meray dareechay say paray raat bharr raqs mein masroof thay khushboo kay qadam raat bharr main, meri maghmoom nigahein, meri yaas, teray aanay ki sarr-e-shaam lagi thi jo mujhay wohi damm torti aas, dill mein mehka huwa ghamm aur yeh palkein pur namm, meri maghmoom nigahein bekhwab raat bharr jaltay rahay apnay hi shoalon mein gulab!!
GUNAAH GAAR Baat karnay ki kabb mili muhlat haal ik doosray ka kabb poochha chandni raat kay dareechay mein uss nay yeh haath,haathmein na liya barishon mein kabhi na bheegay saath dhoop mein dhoond pa'ey kabb saya uss nay bandha nahin ko'ei peman main nay manga nahin ka'ei waada kuchh ajab tarz ki muhabbat thi kuchh ajab tarah ka yeh ishq huwa yoonhi ik phool kay chataknay parr taalib-e-mosemm-e-bahar hain hamm zindgi kay taweel rastay parr ik nazar kay gunaah gaar hain hamm! AAKHIR-E-KAAR Phir aakhir-e-kaar bannd kamray mein himmatein sari jamma karr kay yeh hoant,tasweer parr jhukay hoant tashnagi say sulagtay, wehshi wajood,andar ki kashmakash say chatakh raha tha to hoant tasweer parr jhukay jabb chhoowa labon ko ik aanch nikli--- to jall ga'ey hoant aur sara wujood shoalon mein ghirr gaya tha! GHAZAL Janay kya kya na tamasha ho ga Dill bharay shehr mein tanha ho ga Bewafa mujh ko samajhnay walay! Tera mayar-e-wafa kya ho ga? Kisi boaseeda dareechay say kabhi Naya manzar nazar aata ho ga? Meri qismat mein to weerani hai Ha'ay,woh shakhs bhi tanha ho ga! Yaas mein behtay huway ashkon say Uss ka takya kabhi bheega ho ga Chand raaton kay guzar janay parr Janay kis haal mein darya ho ga! HAREEM-E-JAAN MEIN VIOLIN Bannd jharokay,bhari parday jalti bujhti kuchh sham'ein aur khamoshi ki sa'ein sa'ein harr soo pheli roshan roshan tareeki aur chupp ki gehri chhap phirr uss parr tanha'ei--- phirr chiknay farsh pe saya larzay khushboo bikhray,tara chamkay, aik hayola paas aa'ey phir sargoshi ik madhamm pyari sargoshi, kuchh bojhal sansein aankhein bannd huwi ja'ein aur sarshari nazdeek kahin phir khali khali hall mein bajay ik violin! AAWAZ-E-DOAST Ko'ei aawaz aati hai buhat hi faslay say,ghaleban barson ki doori say mujhay aawaz aati hai udasi hai ke charon samt meray chha'ei jati hai yehi aawaz,meray dill ki dharkan jaan ki rahat thi yehi aawaz, sacha'ei thi meri rooh ki aawaz---iss ka zer-o-bamm lehja---ke rass kanon mein tapka'ey wohi ghambirta woh jana pehchana raseela pann wohi shafqat, magar barson ki doori hai meray kanon say iss aawaz takk ha'el yeh kaisi be basi hai mujh say yeh aawaz--- yeh jani huwi aawaz pehchani nahin jati! IK RAAT UJALO MERAY LI'AY Ik raat ujalo meray li'ay main sao jaoon, tumm jago ik shabnam hath rakho seenay parr lams jagay to labb mehka'o saans mein phool khila'o hawa chalay to palkon parr taray barsa'o neend kay parr phelay ja'ein phir khwab samandar jhago ik raat ujalo meray li'ay main soa ja'on tumm jago!
PHIR PURANAY HIJR Phir Sitambar ka maheena aa gaya hay sath lay karr, beetay waqton ka fusoon aur guzray barson ka tilism, phir gulabi subhein aa'iin shabnam aalooda shabein phir aankh parr utray sunehray khwab bhooli chahton kay qafilay aanay lagay aur dill kay andar ghantiyan bajnay lagiin phir guzray waqton mein sunay geeton ki tanon,saaz ki lai nay sama'at ko chhowa, aur raat dinn ik aalam-e-khwabeedgi mein gumm huway aur dill mein meetha meetha dard sa honay laga phir qurbaton kay thehray paani jaisay mosam mein ko'ei kankar gira mujh ko, puranay hijr yaad aanay lagay! KHULI HUWI KHIRKIYON SAY IK SHAAM Khuli huwi khikiyon say ik shaam jhankti hai ajeeb aalam hai zindagi meri bheegti putliyon mein jesay dharak rahi hai, tumhari yaadon kay sa'ay sa'ay dhundalka paeron ki chotiyon parr utar raha hai shafaq khamoshi say phail karr door takk bikhartay haseen manzar kay canvas parr hazar ranngon pay ik gulabi chirak rahi hai main tumm say kitni hi door hoon parr tumhari qurbat ki taez hiddat say jall rahi hoon main saray manzar say bhi alag hoon magar shafaq say wujood gulnaar ho raha hai khuli huwi khirkiyon say ik shaam jhankti hai! MAAH GAZEEDA Harr shab-e-firaq mein,yeh chand badlon ki aoat say ho mujh pay taana zann main munh chupa'on iss say munh chupa'on taaray khilkhila kay hanns parein yeh chand kay paroas mein hain mera raaz jantay na hon hawa chalay to muskuray jaisay chand nay isay bhi meri sabb ketha suna'ei ho kabhi khujoor kay buland paer ki phunang say tiktiki laga'ay dekhta rahay kabhi yeh baam say takay main jheenp ja'on, mann mein aag si lagay main kya karoon shab-e-firaq! mairay wastay,mujhay jalanay ko,buhat hai too main teray zehr say bachoon ke chand kay? shab-e-firaq! too bata yeh chand meray tann ko ki'on dasay? main kya ji'oon gi subh takk mera badan to iss kay zehr say sunehra ho gaya!
TERA NAAM Tera naam din kay zewal parr,meri roshni Tera naam shaam-e-safar,sitara-e-rehbari Tera naam shehr-e-malal mein,kaff-e-dosti Tera naam,meri mataa-e-jan,meri sha'eyri Mujhay harr para'o pe chahi'ay, teri hammdami GHAZAL Main tumharay aks ki aarzoo mein bass aayina hi bani rahi Kabhi tum na samnay aa sakay, kabhi mujh pay gard pari rahi Woh ajeeb shaam thi,aaj tak meray dil mein uss ka malal hai Meri tarah jo teri muntazir, teray rastay mein khari rahi Kabhi waqf-e-hijr main ho gaei,kabhi khwab-e-wasl mein kho gaei Main faqeer-e-ishq bani rahi, main aseer-e-yaad huwi rahi Bari khamshi say sarak kay phir meray dil kay gird lipat gaei Woh rida-e-abr-e-sfed jo sar-e-kohsar tani rahi Huwi uss say jabb meri baat bhi,thi shareek-e-dard woh zaat bhi To na janay kon si cheez ki meri zindgi mein kami rahi TERAY DHYAN MEIN Ga'ei raat bhi, roaz ki tarah main bass teray dhyan mein so ga'ei thi ajab khwab mein kho ga'ei thi buhat door chalta huwa rasta aik jangal mein ja karr kahien rukk gaya tha, sitaron bhara aasman iss zamien ki taraf jhukk gaya tha!
PIYA BAAJ PYALA PIYA JA'AY NA Mujhay aisi doori ki aadat nahin thi ke jo zindgi ki ragon say jawan khoon ki aakhri boond takk khainch lay, jism ka khaet banjar karay, iss li'ay jabb say too uss safar parr gaya main nay aaiyna dekha nahin, saari dunya say aur aasman takk say parda kiya, main nay sardi mein dhoop aur garmi mein sa'ay ki parwa na ki, zindgi ko na samjha kabhi zindgi, aad'tann saans li! bhook to marr ga'ei thi juda'ei ki pehli hi sa'att mein lekin abhi pyaas baaqi hai aur aisi zalim, ke meray badan parr babool ugg rahay hain, zuban parr bhi kantay paray hain, mujhay aisi doori ki aadat nahin hai ke jo mot aur zindgi mein ko'ei farq rehnay na day phirr bhi yeh jaan lay--- garr mujhay chashma e aab e hewan bhi mill ja'ay--- ikk boond teray bina, mujh pe ja'yez nahin! TERAY GHAMM KA JAMAL Aik khushboo si ko'ei teray shabistan say chali aati hai, roshni bann kay--- kabhi moj-e-hawa ki soorat, yeh gumaan hota hai phela hai meray jism pay neendon ki tarah---tera khayal, phool khiltay hain meray khwab say bahar bhi kahin dill say aankhon talak aata hai teray ghamm ka jamal SAFAR Main siyah raat kay safar parr hoon aik qendeel yaad-e-janan ki hath mein hai,magar hawa hai taez main to ik baat kay safar parr hoon jo kisi kunnj-e-labb say phooti thi aur meri tamam umr ko--- aik dasht-e-pur khaar mein dhakael ga'ei saari subhein,usi kay naam huein saari fathein,usi kay naam huein main,faqat maat kay safar parr hoon main to ik baat kay safar parr hoon! AASMAN! KABB AA'O GEY? Aasman! main tumharay ishq mein faqeer hoon magar tumhari wus'aton kay samnay haqeer hoon, tumm aa'o gay ke main uraan karr kay aa'oon badlon ko cheer karr? main kaisay aa'oon kaisay toar doon tilism-e-khak ko ke jiss ki main aseer hoon? ke aik musht-e-khak ki reha'ei---khakdan say ik khayal hai,mahal hai, magar yeh ishq bhi jahan kay wastay misal hai isi liay tumm aa'o gay! main aab deeda,ghamm gazeeda, muntazir hoon Aasman! kabb utar kay meray dill mein aa'o gay? SAZA Ja'o! nafrat karnay walon kay chehron ko dekho, unn ki aankhein,dozakh kay darwazay hain aur teh khanon mein jalti aag say unn kay dilon ki deewarein kaali hain, unn chehron ko dekho jin kay daant,dahan say bahar jhanktay rehtay hain aur baat karein to munh say unn kay kaff behta hai, jin ka samna sacha'ei say namumkin hai, jo phoolon ko rond karr aagay barhh jatay hain, jin kay roshann daan pay kabhi parinday baith kay geet nahin gaatay, jin kay aangan mein ja karr dhoop aur barishein iffat kho deti hain, jin ki zubanein,khush lafzon say nawaqif hain, jin kay harf kisi achhay ki sama'at say takra karr pathar bann jatay hain woh,jo logon ki khushyon ki mot pay khushi manatay hain, sa'el parr kutay chhortay hain, aur apnay darwazon parr kalay peelay ranng say khoapriyan banwatay hain, ja'o! aur unn chehron ko dekho aaj say tumm unn mein shamil ho! GHAZAL Na shoq hai na tamanna na yaad hai dill mein Ke mustaqil kisi ghamm ki nehad hai dill mein Hai alif laila-o-laila si zindgi darpaesh So jagti huei ik Shehrzad hai dill mein Jo zabt-e-chashm kay baa'es na ashk bann paya Uss aik qatra-e-khoon ka fasad hai dill mein Phir aik sheh-e-Saba say bulawa aaya hai Phir aik shoq-e-Suleman nazad hai dill mein Hai aik sehr-e-dill aawez ka aseer badan To jaal binti,ko'ei aur yaad hai dill mein Tamam khwahishein aur hasratein,tamam huein Magar jo sabb say ajab thi,murad hai dill mein WOH SHAAM ZARA SI GEHRI THI In hijr zada aur ranjeeda aankhon say zara neechay jhukk karr teri yaad mein bheegay rukhsaron kay zard kinaron parr aa karr ghabra'ei huei si utri thi aur thori daer ko thehri thi abb yaad nahin,teri aankhon mein ko'ei khwab tha-koei sitara tha teray honton ki unn qoson parr ko'ei lafz tha -ko'ei ishara tha kya shaam kay rastay parr rukk karr teray dill nay mujhay pukara tha? bass yaad hai itna,jabb dill nay iss umr ki hadd say kuchh peechhay ik baar palat karr dekha tha--- raston pay khilay sabb phoolon parr ik abr ka saya jhukta tha aur shaam zara si gehri thi! KHWAB MUSAFIR Khwab musafir! kis manzil ki khwahish mein tumm chupp nazron say, rasta rasta, meray peechhay bhagtay ho tumm soatay ho ya jaagtay ho? kaisay haray haray lafzon ka gehra jaal buna hai tumm nay, jiss mein meri chahat ka nao ranng parinda phansna hai aur ummidon ki deewar say meray dill mein jhankna hai apnay khwab ki manzil takk janay kay liay tumm meri khwahish kay pull parr chalna chaho---yeh namumkin hai main to khud, khwab aur khahish kay beechon beech--- atakti hoon aur roati hoon, janay kitnay hi janamon say--- aadhi neendein soati hoon! ABB MERA PYAAS PAYALA Kaisa pyaas payala lay karr amret kay ik ghoont ki khatir ghoomtay phirtay--- meri raah mein aa jatay ho, meray khali pann ko daekh kay hanns partay ho, dhoop say thoara chandann lay karr apnay hoton say chhoo karr meri aankhon mein rakhkh detay ho raat kay mann say kalak lay karr tumm apni aankhon say laga karr meray khwab mein dharr detay ho, apnay dill ki betabi ko kuchh lafzon say-kuchh baton say meray dill mein bharr detay ho, tumm barish ka meetha paani khud chakhtay ho--- aur apna woh pyaas payala,baaqi umr ko meray hath thuma jatay ho! YEH HAIRAT GAAH-E-DUNYA HAI Yeh hairat gaah-e-dunya hai basar matt khwab mein karna musalsal jagtay rehna, agar iss jaa pay rehna hai yeh mumkin hai ke bass ik aan mein manzar badal ja'ay nazar ka zikr kya,mehboob ka paikar badal ja'ay yeh mumkin hai kisi kha'ei pay hi yakk lakht rasta khatm ho ja'ay kabhi darya pay puhncho aur kinara khatm ho ja'ay yeh mumkin hai kabhi dekho inhien qadmon main bethay kuchh sarapa naaz logon ko kabhi dekho qaba-e-dosti mein sabb zamana saaz logon ko thi jin say harf-e-khush ki aas unn honton pay taana ho, woh jin mein phool mumkin thay unein hathon mein dashna ho, buhat hushyar rehna hai yeh hairat gahh-e-dunya hai! GHAZAL Ilhaam, wahhi k shairi hai Iss dil pay jo aaj utar rahi hai Yeh wasl hai ya main khwab mein hoon Hai khwab k wasl ki ghari hai? Soya hai wajood aur dil mein Ik cheez ajeeb jaagti hai Khushboo say mehek raha hai aangan Aur tan pay bahaar aa gaei hai Aaghosh mein khill uthha hai gulshan Hontoan pay gulon si taazgi hai Aankhon mein charagh jall rahay hain Maathay pay anokhi roshni hai Kuch door pay hai khizaan ka dera Basti yeh bahar mein basi hai Main raah pay teri chal rahi hoon Duniya meri samt dekhti hai Kam hon gay aseer-e-yad-e-janan Yeh bhi to ataey zindagi hai GHAZAL Tanha, sar-e-anjuman khari thi Main, apnay wisaal say bari thi Haan phool thi, aur hawa ki zad par Phir meri har aik pankhari thi Ik umr talak safar kya tha Manzil pay pohanch kay gir pari thi Talib koi meri naffi ka tha Aur shart yeh mot say kari thi Woh aik hawa-e-taaza mein tha Main, khwab-e-qadeem mein gari thi Woh, khud ko Khuda samajh raha tha Main, apnay huzoor mein khari thi
Kuchh ranj na koei be qarari Dil par hai ajab sakoot tari Takseem to ho rahi hai rahat Aati hi nahin hai meri baari Ulfat mein tha sehl jaan dena Ik cheez yehi thi ikhteyari Dil dard mein doobta tha lekin Aankhoin say huway na ashk jaari Sab choom kay pichhay hat gaey thay Pathar tha wafa ka sakht bhaari Dushman ki sipaah bhi thi shashdar Iss shaan say main nay jang haari Afsos tha pichlay mosamon ka Yeh rutt bhi mili to intazaari Jab ban gaya aasman, samander Saahil pay buss aik shab guzari Iss baar na bach sakay gi shayad Chahat ko laga hai zakham kaari GHAZAL Honay pay main apnay roa rahi hoon Hasti ka yeh daagh dho rahi hoon Shakhon pay meri khilaein gay sooraj Mitti mein kiran jo bo rahi hoon Uss shakhs ka dekhna qayamat Khud apna suragh kho rahi hoon Kis ranj say hath paaon shall hain Aur zard tamam ho rahi hoon Kis baat say dil dukha huwa hai Aansoo kay bagher roa rahi hoon Ab tark bhi kar chuka to kya gham Main teri murad to rahi hoon Banhon mein simat gaei hoon apni Aaraam ki neend so rahi hoon |
ROMAN |